Chikunguru, 07/07.....zuva rekurangarira

Kuyeuka Hama Dzedu Dzakatungamira,

Taungana nhasi isu vana VaNjanji

Tichikuremekedzai Baba Njanji

Nemudzimai wenyu Selina mwana waMutopo,

Mamukomba zvino mwanakomana wenyu Foshi

Uyo aikudai kunge ndiye aiva ega mhodzi yenyu,

Maidei naNjodzi varikwavo kunze kwemusha kwamakavadyara,

Naivo vanofara nokuti ndivo vava nemi Baba namai

Asi vatungamirwa nemukoma wavo

Zvino votariswa nedangwe raNjanji Stephen,

Akaramba kudyarwa ega kunze kwemusha

Asi nhasi ava neshamwari dzake Maidei naNjodzi

Dangwe renyu ravabata maoko kutevera anatete vavo

Nhasi uno vakakombwa nehanzvadzi dzababa vake Herina veVherenika

Vese vakavhumbamirwa naKuvi mwana waVhuramai

Anova ndiye nyakutumbura mhuri,

Iye Kuvi neziso rerudo achinyemwerera

Nemazino ake akachena kunge mukaka mukanwa osekerera

Pamwe nahama dzake dzemusha wesewaMusoko,

Kuvi mwanasikana WaMusoko

Tinoisa maoko kwamuri mese, tichikurangarirai nhasi

Nekutiberekera Kuvi uyo akapa upenyu kumhuri

Uyo akatiberekera Njanji Baba uyo akawana Selina amai vedu

Nhasi ndichirangarira vese handikanganwe chisekerere wenyu Savior

Uye makatora zuro rino

Achisiya mapudzi ake asina kana kukora,

Pamusoro pazvo mukati haafambe ega,

Kusina mazuva Nyarai muzukuru wenyu mukamuita muperekedzi,

Misodzi isati yaoma mukatorazve,

Chido chemwoyo hama yangu yePadyo Sisi Tracy,

Nhasi ndinoshaya zororo pfungwa dzinondiwandira,

Ari mupenyu Tracy aiti ndashaya mukoma wekutaurira,

Zvinondirwadza pamwoyo, ndisinganzwisise

Nhasi ndazvinzwisisa zvaaireva,

Achiripo ndaiturira kwaari,

Nhasi handichisina mukoma wekuturira,

Mhezi yepamwoyo isina makwenyero, inondivava,

Chititarisai isu mapunha enyu pano pamusha

Nemumative ese enyika kana mhiri dzemakungwa

Vana vapera kupararira, semashizha

Asi seshiri ndinoziva havakanganwe

Vanoziva kuti mudzimu weshiri uri mudendere

Akombwa zvino makuva evakuru pamusha apo nepwere

Akakombwa zvino nemanhanga aVerenika, naHerina, naNjanji

Handikanganwe zuva rakadyarwa dangwe raTabhoyi, Rudhu

Iwe Herina uchiridza huhwi, muchuru sebere ratorerwa mwana

Kuti inga vana vadiki vapera pamusha

Wakaoneiko tete vangu hanzvadzi yababa vangu,

Iye zvino zvuru zviye zvadyarwa mapudzi ari kuparara,

Zvino isu sevana vapenyu toti kwamuri,

Chivatarisai imi mese muri kumafuramhepo

Nerudo chivavhumbamirai mapunha enyu,

Vagokurangarirai nendyaringo dzamakavadzidzisa

Nemisodzi nekugunun’una vanokurangarirai

Mese vakuru nevadiki vemumusha uno

Isu vana venyu vamakasiya tichingochema,

Asi tichiziva kuti imi makatungamira,

Nesu inguva chete tichatevera hedu,

Zororai henyu murugare mese imi muri kuchamhembe.